بلتی مرثیہ اور نوحہ بسران مسلم لیریکس

مرثیہ طفلان مسلمؑ

Marsiya and noha 

مسلمؑ شہید بیا سینا لزالا کھوئے فیاغی نونونگ

یود پہ شریحی ننگنو سکیورے دہ سومید توژیونگ

ژھور چوکس زیادی بولا میونی یود بو مسلمی

ہلتہ سوئی ننگنو یود نا دوسے ہرتخفہ مید دیوی

سکوسے یولینگنو مسلم بونگ یخنہ سوس زباسے

بیونگ نارے جوکلہ ناسی می یق کھو قتل بیاسے

یا سکت کوسے شریحی نونونگ کھیونگسے ہلتین چہ نو

شک سونگسے ترید چی فری بید یانی غوبرو

شاید بٰبی کھا تھونسیدا دشمن لا چھوقسے چنگ

نوس لزبا مہ کھیود پہ قاضی شریحی نونونگلہ ینگ

لس جوکلہ دوقسے نوینچہ زیرید پہ نونو نگلا یو

ستور سید ببا یدانگلہ خدا من شیک صبری زدیو

تھیاقپہ ملوسپہ برمید یکھا فوقفی لزا تروسے 

وا غربتٰا ابتٰا زیرین نونونگ نوسے

قاضی ننگ ینگنہ بیونگسینا گوید ہے یولینگ توژیونگ

لم ہلتمنہ شوخص مید نا ستورید مسلمی توژیونگ

مرثیہ پسران مسلم

مسلم عقیلی نونو نیس کوفہ یود پا

ظلمیکہ ببا گیور فی خبر نسکلہ مید پا

ژھن نین ببا لا ہرژیک زیرے نوین دے نونو نسکا

ببی ژھڑانی مینگنو ژہیگینچہ ہرتنے جوید پا

دروخمویکہہ لغور زیرس نیا مسلمی توژیونگ این

دے حارث ملعون شقی سناویکہہ کوید پا

ستونگ گیود پہ تہونے نادے توژیونگ حارث لقلا

دے ظلمی لغینگ چینگسے کہو ملعونی کہرید پا

چونچو پو نہ چون چونپو لا گڈ تانگسے ردونینچہ 

شوبرزنپو رگی فیونگسے دونو تانگسے کہرید پا

تہونما نا فراتیکہا ژھیرین دے نونو نسکا

چیک چیک پووسی گیوخسے نہ دروب زیرے غوبید پا

نوحہ پسران مسلمؑ

خنمی گردیشی بیو یتمان مسلمؑ

سکورین سترانگبو سترانگبو یتیمان مسلمؑ

درولے خلدے گلینا قضا لم سکیا لینا

تھونے حارثی زگوا یتیمان مسلمؑ

تہونے ظلمی کھا لق ہائے ہائے چینگسے فیقلق

نازک رگونیکھا تھیاق یتیمان مسلمؑ

زیرید تمپو راوی سی تیانین ظلمی سیلی 

کرو ژوس بیاسپو نیلی یتیمان مسلمؑ

دارید عرش عُلا زیرین رَبّ اعلے

چنونگ بید نا حقلا یتیمان مسلمؑ

ژھنی وخ رگلے نا غوبین فیونگس صبٰانا

ردونین کہیرس چھو کھا لا  یتیمان مسلمؑ

کسل بیونگ فچولین چہ فیغی سنینگ ژھرینچہ

فودے تونگ زیرینچہ یتیمان مسلمؑ

غوبین تھمسے تھوالا رحم بیوس نیا لا

ہنّا کھیر زیاد لا یتیمان مسلمؑ

ہنّا بیوس کہیری تون نیا نورچیلا تونگ

ہرکلونگ برقسینا ژونگ یتیمان مسلمؑ

کسل کن مکوانا غوبین زیرس خدا لا

شخ من ہے نیالا یتیمان مسلمؑ